Kòman pouw gen bèl po epi po ki an sante?

Moun ki manje plis fwi ak vejetab nan yon jounen gen plis chans pou yo pa devlope pwoblèm po, sitou kansè nan po.

Sak fè sa? Ou jwenn bon valè vitamin ak mineral nan fwi ak vejetab.

Kòm egzanp, ou jwenn vitamin A, D, C ak E nan fwi ak vejetab yo. Vitamin sa yo esansyèl pou pow. Menm nan anpil pwodwi  bote kap vann, konpani yo ajoute kèk nan vitamin sa yo ladan yo. Ann fè yon ti pale de yo.

Vitamin A:  Li edew wè byen, epi li ede kòw redwi fòs reyon solèy la sou pow. Ou jwenn vitamin A nan kawòt, ze, patat, lèt, abriko  ak mango.

Vitamin D: Pi gwo sous vitamin D se solèy la. Pa gen anpil manje ki gen vitamin D ladan. Kèk manje ki gen vitamin D se fwa bèf, pwason, pati jòn ze a ak fwomaj.  Anpil konpani ajoute vitamin D nan kèk manje tankou sereyal.

Fòk mwen ajoute, plis pow pi nwa se plis ou riske pouw genyen yon nivo vitamin D nan sanw ki ba. Rezon an se paske moun ki nwa gen yon pigman nan kò yo ki rele melanin. Se melanin sa a ki bay po a koulè nwa a. Melanin sa a gen kapasite pou li bloke valè solèy ki ka antre nan pow e sa bon pou po a, men alèkile nou fe plis tan anndan kay osinon nan machin. Nou pa ekspoze a solèy la. Se yonn nan rezon ki fè nivo vitamin D nan san anpil nan nou ba.

Vitamin C:  Li ede pow rete dyanm kont reyon solèy la epi li redwi sou valè pli ou gen nan pow.  Nou jwenn vitamin C nan piman dous, brokoli, papay, ak zoranj.

Vitamin E: Vitamin E ede pow konbat reyon solèy la ak tout sa ki pa bon ki nan lè kote wap viv la ki ka domaje pow. Ou jwenn vitamin E nan fèy vèt tankou epina, nan nwa, zaboka ak fwi nan lanmè yo tankou pwason.

Tout vitamin sa yo mwen sot mansyone la, vitamin A, D, C ak E yo aji kòm antioksidan e nan fason pa yo, yo pwoteje pow. Chache manje ki genyen yo pouw ka pwoteje pow epi genyen yon po ki an sante.

Mirline Fourron, MS, RD, LDN